2026-жылы Ысык-Көл облусунда электр тармагын жаңылоо иштери улантылып, 2000ден ашык эскирген жыгач мамылар жаңы темир-бетон мамыларга алмаштырылат. Бул иштер Кыргыз Республикасынын Энергетика министрлиги жүргүзүп жаткан реформалардын алкагында «КУЭТ» ААКнын Ысык-Көл электр тармактар ишканасы тарабынан ишке ашырылат.
Алмаштырылуучу жыгач мамылар 1960–70-жылдары орнотулуп, эксплуатациялык мөөнөтүн эки эсе өтөп, бүгүнкү күндө авариялык абалга келген. Жаңы темир-бетон мамылар электр энергиясын үзгүлтүксүз жана коопсуз жеткирүүгө шарт түзүп, тармактын ишенимдүүлүгүн арттырат.
2026-жылга карата мамылар төмөнкү райондор боюнча орнотулат:
Ак-Суу РЭТ – 258 даана
Каракол РЭТ – 260 даана
Жети-Өгүз РЭТ – 263 даана
Тоң РЭТ – 543 даана
Чолпон-Ата РЭТ – 314 даана
Түп РЭТ – 229 даана
Балыкчы РЭТ – 282 даана
Планга ылайык темир-бетон мамылар 2026-жылдын ноябрь айынын аягына чейин орнотулуп бүтөт.
Белгилей кетсек, 2025-жылы ишкана 1500дөн ашык темир-бетон мамыларын ийгиликтүү орнотуп, бир катар аймактардагы эски инфраструктура жаңыланган.
2026-жылы орнотулуучу мамылар Ысык-Көл электр тармактар ишканасынын өзүнүн темир-бетон чыгаруучу цехинде даярдалат. Бул цех 2017-жылдан бери Балыкчы райондук электр тармагынын аймагында ийгиликтүү иштеп келет. Бул жерде СВ-110 жана СВ-95 маркасындагы сапаттуу темир-бетон мамылар чыгарылат.
Жүргүзүлүп жаткан жаңылоо иштери — аймактагы электр камсыздоонун туруктуулугун жогорулатууга, авариялардын санын азайтууга жана керектөөчүлөргө сапаттуу кызмат көрсөтүүгө багытталган маанилүү кадам. Ысык-Көлдө энергетикалык инфраструктураны модернизациялоо иштери мындан ары да ырааттуу улантылат.
📞 Электр энергиясына байланыштуу суроолор үчүн төмөнкү номерлерге кайрылыңыздар:
105; 1209
📱 +996 772 001209; +996 556 001209
📲 WhatsApp: +996 702 001209
