Энергетика министрлигинин электр энергиясы менен камсыздоонун ишенимдүүлүгүн жогорулатуу боюнча программасынын алкагында Ысык-Көл электр тармагы ишканасы 2025–2026-жылдардын күз-кыш мезгилине карата даярдык иштеринин толук комплексин бүтүрдү.
Даярдык иштеринин негизинде энергетикалык объектилерде, электр берүү чубалгылары менен көмөк чордондордо пландык оңдоо жана техникалык иштер аткарылды. Негизги максат — алдыдагы күз-кыш айларныда мезгилинде Ысык-Көл облусунун керектөөчүлөрүн ишенимдүү жана үзгүлтүксүз электр энергиясы менен камсыз кылуу.
Даярдыктын жүрүшүндө төмөнкү негизги иштер аткарылды:
2025-жылдын башынан тартып 35тен 220 кВга чейинки чыңалуудагы 61 подстанцияда 4863 даана электр жабдуусуна техникалык тейлөө жүргүзүлүп, алардын 436сына капиталдык оңдоо иштери аткарылды.
иш-пландын негизинде 35–110–220 кВ чыңалуудагы 100,7 чакырым электр берүү чубалгылары оңдоп-түзөөдөн өткөрүлүп, 1422,6 чакырым аба чубалгыларына техникалык тейлөө жүргүзүлдү жана эскирген 6837 фарфор изолятору жаңы айнек изоляторлоруна алмаштырылды.
Мындан тышкары, ишкана тарабынан 10/0,4 кВ чыңалуудагы 1222 көмөк чордон жана 1687 чакырым аба электр берүү чубалгыларына техникалык тейлөө жүргүзүлдү.
Ошондой эле 211 чакырым аба чубалгылары жана 223 көмөк чордон 10/0,4 кВ оңдоп-түзөөдөн өткөрүлдү.
Оңдоо иштеринин алкагында 757 жыгач мамы, темир-бетон мамыларга алмаштырылды.
Мындан тышкары, тарнсформатор оңдоо цехинин кызматкерлери 105 трансформаторду оңдоп, болжол менен 26,2 тонна трансформатор майын тазалашты.
Жогорудагы иштер алдыдагы күз-кыш мезгилин ийгиликтүү өткөрүү жана керектөөчүлөрдү сапаттуу электр энергиясы менен камсыз кылууну жогорулатуу максатында жүргүзүлдү.
