Электр энергиясын керектөөнү байкатпай көбөйткөн 7 адат
14 Август 2026 ж.
Биз электр энергиясын көп керектөө күчтүү электр шаймандарынан гана болот деп ойлойбуз. Чындыгында, күнүмдүк айрым адаттарыбыз электр энергиясынын ашыкча сарпталышына себеп болот.
1. Жарыкты «керек болуп калар» деп күйгүзүп коюу
Бир бөлмөдөн чыгып кеттик, бирок жарык күйүп калды. Үйдөн чыгып кеттик — коридордо жарык күйүп турат.
Бир лампочкадан көп деле өзгөрүү болбойт деп ойлойбуз. Бирок бул күн сайын кайталанса, ашыкча чыгым акырындап көбөйөт.
Жөнөкөй адат: бөлмөдөн чыкканда жарыкты өчүрүңүз.
2. Электр чайникти ашыкча көп иштетүү
Чайникке керектүү өлчөмдөн көп суу куюп, кайра-кайра ысытабыз.
Жөнөкөй адат: канча суу керек болсо, ошончо гана куюңуз.
3. Электр шаймандарын күтүү режиминде калтыруу
Телевизор, компьютер, оюн приставкасы жана башка айрым шаймандар колдонулбай турган учурда да электр энергиясын сарпташы мүмкүн.
Жөнөкөй адат: шайман узак убакыт колдонулбаса, аны толугу менен өчүрүңүз.
4. Муздаткычты себепсиз кайра-кайра ачуу
«Эмне жесем экен?» деп муздаткычты ачабыз, карайбыз да кайра жабабыз. Бир аздан кийин кайра ачабыз.
Эшик ар бир ачылган сайын муздаткычтын ичиндеги температураны кайра калыбына келтирүүгө энергия сарпталат.
Жөнөкөй адат: эмне ала турганыңызды алдын ала ойлонуп, муздаткычтын эшигин көпкө чейин ачык кармабаңыз.
5. Кир жуугуч машинаны аз кийим менен иштетүү
Кир жуугуч машинаны жарым-жартылай гана толтуруп иштетүү — электр энергиясын жана сууну натыйжасыз пайдаланууга алып келет.
Жөнөкөй адат: мүмкүн болушунча машинаны ылайыктуу көлөмдө толтуруп, керектүү режимди тандаңыз.
6. Кондиционерди туура эмес колдонуу
Ысыкта кондиционерди мүмкүн болушунча төмөн температурага коюп салабыз. Бирок бул бөлмөнү сөзсүз тезирээк салкындатат дегенди билдирбейт.
Жөнөкөй адат: ыңгайлуу, орточо температураны тандап, кондиционер иштеп турганда терезе-эшиктерди жабык кармаңыз.
7. Эски электр шаймандарына көңүл бурбоо
Айрым эски электр шаймандары заманбап энергияны үнөмдөөчү моделдерге салыштырмалуу көбүрөөк электр энергиясын керектеши мүмкүн.
Жөнөкөй адат: жаңы техника сатып алууда анын энергияны үнөмдөө көрсөткүчтөрүнө жана техникалык мүнөздөмөлөрүнө көңүл буруңуз.
Эми кичинекей эксперимент жасап көрүңүз
Бир күн бою өзүңүздүн адаттарыңызга көңүл буруп көрүңүз:
бөлмөдөн чыкканда жарыкты өчүрүңүз;
кереги жок электр шаймандарын өчүрүңүз;
чайникке керектүү гана көлөмдө суу куюңуз;
муздаткычты себепсиз көп ачпаңыз;
кондиционерди туура жана үнөмдүү колдонуңуз.
Балким, сиз да бир гана электр шайманын өз убагында өчүрүү менен канча энергияны үнөмдөөгө болорун байкайсыз.
Энергияны үнөмдөө чоң өзгөрүүлөрдөн эмес, күнүмдүк кичинекей адаттардан башталат.
